KALIBO, Aklan–Patay ro 14 ka mga alagang manok it sangka pamilya matapos nga gin-atake it owa pa matumod nga sapat sa Brgy. Marianos, Numancia.
Suno kay Roger Revesencio, tiyo it tag-ana it manok nga nakibot eon lang sanda kat makita nga nagahamyangon, wasak ro likod ag owa eon it mga tinae ro mga pang bueang nga manok.
Pagasaburan eon kunta it anang gumankon ro mga alaga kara pag-uli nanda halin sa Brgy. Bulwang.
Owa sigon nanda gina-ekspektar ro hitabo bangud maayos pa ro mga sapat antes sanda nagpanaw kamana man nga nakasarado ro pinsa.
Paealigban pa sa pamilya kung ano ro umatake sa andang mga manok.
Sa pihak nga parte, ginpahayag ni Kagawad Londy Tuazon it Brgy. Marianos, Numancia nga bukon it raya ro unang beses nga may natabo nga pag-atake sa mga alagang manok sa andang barangay.
Gina-uean makaron it nagkaeain-eain nga reaksyon ro Facebook post ni Tuazon angot sa pagkamatay it 14 ka mga manok.
May pila nga nagapati nga kahimuan raya it aswang ag may iba man nga nagahambae nga kahimuan raya it sapat ukon ilo.
