Kapin sa 15 ka panimaeay ro naabo sa nagtuhaw nga sunog sa Brgy. Tigayon, Kalibo.
Suno kay Punong Barangay Gil Morandante, ginatantya nga 25 ka panimaeay ro nakatindog sa nasambit nga compound nga ginaistaran it mga residente nga tumandok it banwa it Libacao.
Apang, ro nasambit nga eogta hay ginapanag-iyahan it pamilya Cipriano ag ginarentahan it mga biktimang pamilya.
Suno pa kay kapitan Morandante, haeos kaeabanan sa mga raya hay pang-scrap ro andang pangabuhian kon sa siin raya ro ginatan-aw nga base may mga nakatambak nga plastic nga nagresulta sa madasig nga pagdaeagan ag pagbahoe it kaeayo.
Dugang pa nana nga mga light materials ro andang mga panimaeay rason nga madasig gid nga naduktan it kaeayo ro naga-ililiping nga baeay.
Angot kara, nagpanawagan man si kapitan Morandante sa mga may mabinueawanon nga tagipusuon nga makabulig sa mga biktima nga temporaryong nagpataliwan it gabie sa covered court it nasambit nga barangay.
