KALIBO, Aklan—Ginkumpirma ni Police Lieutenant Colonel Don Dicksie De Dios, hepe it Malay Municipal Police Station ro pag-abot it unang batch it Philippine Councilors League sa isla it Boracay.
Ginabueobanta nga naga-abot sa masobra 1,500 nga mga councilor ro maga-abot sa isla halin sa Luzon, Visayas ag Mindanao.
Ro 1st batch suno kana hay ginabilog it masobra 700 nga mga councilor kung siin magabuhay sanda it tatlong adlaw sa Boracay.
Agud nga masiguro ro kaeuwasan it mga bisita, naka-full alert makaron ro bilog nga pwersa it Malay PNP.
Ginmanduan man sigon sanda nga mas pang pabaskugon ro pagbantay ag seguridad sa isla eabi pa ag amat-amat eon ro pagbuhos it mga foreign ag domestic tourists.
Mabahoe sigon nga bulig ro pagbutang it Inter-Agency Task Force sa pinakahaeuga ukon new normal status it pilang lugar nasyon eakip ro probinsya it Aklan para sa uman nga pagbangon it industriya it turismo ag ekonomiya.
