KALIBO, Aklan—Nag-abot sa Isla it Boracay ko Nobyembre 7 ro MS Westerdam, sangka vista-class cruise ship nga ginapanag-iyahan it Holland America Lines.
Sakay kara ro ginaboeobanta nga 2,700 nga pasahero, kaibahan ro mga guests ag crew.
Pila pang international cruise ships ro nakataeanang magadungka sa world-famous nga Boracay hasta nga matapos ro makaron nga dag-on.
Nauna eon nga nagpaguwa ro Department of Tourism-Region 6 it listahan it nasambit nga mga barko kun sa siin sambilog kara ro MS Westerdam.
Nauna eon nga nagdungka ro MS Seabourne Encore ko Pebrero 13.
Ro ikaywa hay ro MS Nautica ko Marso 6.
Ro MS Westerdam of Holland America hay nagdungka ko March 3, apang owa nakapanaog ro mga pasahero bangud sa maeain nga tiempo ag mabaskog nga mga humbak ag makaron hay uman nga nagbalik.
Samtang, uman man nga magabalik sa isla ro MV Norwegian Jewel sa Nobyembre 29 ag Disyembre 1 nga nauna eon nga nagbisita sa boracay ko nagtaliwan nga Nobyembre 3.
Ginataw-an it mga liners ro andang mga pasahero it waeong oras agud nga ma-explore ukon malibot ro white-sand beach, Puka Beach, souvenir shops, ag mga restaurants.
