KALIBO, Aklan—Naga-abot sa 16,730 nga dumueuong nga turista ro nagbisita sa Isla it Boracay ko buean it Hulyo it makaron nga dag-on.
Suno sa Malay Municipal Tourism Office, raya hay nagakahueugan nga haeos 246 percent nga pagtaas it mga foreign tourists sa isla kumpara ko buean it Hunyo nga umabot eamang sa 6,873.
Nakalista man it 6,107 nga overseas Filipinos ukon Pinoy nga naga-istar ag nagatabaho sa ibang nasyon ko Hulyo, mas mataas kumpara sa 4,269 ko Hunyo.
Sa pihak nga parte, maskin nga nagapanguna gihapon sa listahan it tourist arrivals, nagnaba ro numero it domestic tourists sa 160,259 ko Hulyo kumpara sa nailistang 182,508 ko Hunyo.
May kabilugan nga 183,096 nga turista ko Hulyo ukon may average nga 5,906 nga turista kada adlaw, kun sa siin nakasueod gihapon sa gintaeana nga carrying capacity it Department of Environment and Natural Resources nga 6,405 kada adlaw.
Mag-eowas sa ginhaeugaan nga COVID-19 restrictions sa bilog nga nasyon, sambilog pa sa mga ginatan-aw nga rason it pagtaas it foreign tourist arrivals hay ro pag-angkon it international flights sa tunga it Kalibo International Airport ag Incheon International Airport.
Sa makaron hay eampas eon sa 1-milyon mark ro tourist arrivals ukon may kabilugan nga 1,032,143 sa Boracay umpisa Enero hasta Hulyo.
