KALIBO, Aklan—Masobra 50 porsyento ukon kapin sa 1,732 nga mga bakunang gintao it Department of Tourism (DOT) para sa mga tourism worker sa isla it Boracay ro natapos eon nga maiturok sa sueod it tatlong adlaw.
Raya hay halin sa kabilugan nga 3,000 ka mga COVID-19 vaccine nga gintao it DOT.
Kaeabanan sa mga nabakunahan hay ro mga hotel ag restaurant worker, tour guide ag driver it mga pampublikong transportasyon sa Boracay.
Hulyo 7 kat nag-umpisa ro vaccination rollout sa A4 priority group kun siin ginpatigayun raya sa Paradise Garden Resort.
Tuyo kara nga mataw-an it nagakaigo nga proteksyon kontra COVID-19 ro kapin sa 40,000 ka mga tourism workers sa isla.
Raya hay bilang kaparte it pagpahaum it gobyerno sa pagbukas it Boracay sa mas maabo pang turista.
Makaron nga adlaw ginaeuman ro pagpadayun it inoculation nga pagahiwaton sa sangka mabahoe nga mall sa Boracay.
