KALIBO, Aklan—Naga-abot sa 19 nga bags it dugo ro natigayon nga matipon sa ginpatigayon nga bloodletting activity sa multi-purpose building it banwa it Balete sa pagpanguna it andang Local Government Unit, Philippine Red Cross Aklan chapter ag Bombo Radyo Kalibo.
Presente man sa event ro mga taga-Municipal Health Office, kun sa siin, hugut nga ginpatuman ro health protocols nga gintaeana it Inter-Agency Task Force.
Nagpahayag man it pagpasaeamat ro mga lokal nga opisyal sa tanan nga mga nagpasakop nga ginakabig nga mga baganihan eabi pa ag ginpatigayon ro aktibidad sa tunga it pagsukoe it nasyon sa coronavirus disease ukon covid-19 pandemic.
Nauna eon nga ginpahayag it PRC nga ro sangka bag it ginadonar nga dugo hay pwedeng makasalbar it daywa hasta tatlong kabuhi nga nagakinahangean it dugo.
May ginatau man nga kamaeayran sa ikamayad nga eawas ro sangka blood donor.
Base sa record, masobra sa 25 ro nagpasakop apang 19 eamang ro nakapasa matapos ro screening.
Nagpasaeamat pa ro mga opisyal bangud nga target nanda sa aktibidad makatipon it 10 nga bags, apang nag-abot raya sa 19.
Ro mga maswerteng blood donor hay nakabaton man it dugong bombo souvenir t-shirt halin sa Bombo Radyo Philippines ag Star Fm.
