KALIBO, Aklan—Kapin sa 2,000 nga kapulisan halin sa Police Regional Office 6 ukon PRO-6 ag nagkaeain-eain nga municipal police station ro igapakalhit sa nagahilapit nga selebrasyon it Kalibo Sto. Niño Ati-Atihan Festival sa maabot nga Enero 15 hasta 21, 2024.
Raya hay kasunod it ginpatigayon nga send-off ceremony para sa initial deployment it mga kapulisan sa Aklan Police Provincial Office sa Camp Pastor Martelino sa Brgy. New Buswang, Kalibo.
Nauna eon nga ginpasiguro it PRO 6 nga nakaplastar eon ro andang security deployment plan para sa festival.
Kaibahan sa igapadaea it PRO 6 para sa Ati-Atihan Festival hay 44 nga police commissioned officers ag 2,324 nga police non-commissioned officers agud nga magbantay sa nagkaeain-eain nga activity areas.
Mag-eowas kara, may dugang pa nga deployment halin sa augmentation forces, force multipliers ag emergency responders nga magabulig sa kapulisan.
Magatukod man it police assistance desk sa mga strategic nga lugar agud nga mapangayuan it bulig it mga pumueuyu.
Pila sa mga nakalinyada nga events sa ginbansagan nga “Mother of All Festivals” makaron nga dag-on bilang pagtau it pasidungog kay Señor Santo Niño hay ro novena prayer and masses, circuit bike race, “Color my Ati,” barangays’ parade, Ati-Atihan bazar, product expo, food festival, Ati-Atihan nights, street dance, “Barter of Panay,” ag Sadsad Ati-Atihan, ag iba pa.
Samtang, pila sa mga ginabawae sa festival zone hay ro pagbitbit it debotelyang ilimnon, pagpanigarilyo ag paggamit it vape, pagdaea it back pack ag iba pa.
