KALIBO, Aklan—Naga-abot sa 20 katawo ro nagapabilin nga missing matapos ro pagpanaeasa it mudslide sa siyudad it Atami sa Shizuoka, Japan.
Suno kay Bombo International Correspondent Josel Palma it Yokohama, Japan nga ginapatihan it mga local authority nga ro nasambit nga mga indibidwal hay gin-anod it madamoe nga mudslide.
Ginabuebanta man nga kapin sa napueo ka mga panimaeay ro nasamad bangud sa sigidas nga pagbubu it uean halin pa ko nagtaliwan nga dominggo.
Nagpaandam man sigon ro mga otoridad sa mga posibleng pagbaha eabi eon sa mga naka-istar maeapit sa coastal area.
Dugang pa ni Palma nga posibleng nagguba ro pilang ka mga hotspring sa Shizuoka prefecture rason para mas pang magbaskog ro epekto it mudslide.
Nakipag-istorya eon man sigon si Prime minister Yoshihide Suga sa disaster minister para talakayon ro andang pagahimuon nga rescue operation.
