Kalibo Aklan —– May kabilugan nga 1,998 nga Agrarian Reform Beneficiaries ro nakataeana nga magabaton it andang Certificate of Land Ownership Award (CLOA) halin sa Department of Agrarian Reform ukon DAR.
Ginklaru ni Maria Teresa Valencia, OIC Provincial Agrarian Reform Program Officer 2 it DAR -Aklan nga ro seremonya sa Marso 12 hay bukon it provincewide kundi nga regionwide kaibahan eon ro probinsiya it Negros Occidental ag sa Boracay eamang pagahiwaton.
Raya hay may kabilugan nga 2,795.8351 nga ektarya it eugta.
Kaeakip eon sigon kara ro Aklan nga may masobra sa 16 ektarya it eugta nga pagahueayon it 42 nga benepisyaryo.
Sa nasambit nga numero, 31 kara hay magahalin sa Isla it Boracay.
Kaabuan sa mga pagataw-an kara hay miyembro it Boracay tumandok agrarian reform beneficiaries organization ukon mga ginakabig nga occupants of public land.
Ro ugtang igapanupod hay sa parte it ginlimpyuhan nga wetland number 6 sa Sitio Tulubhan, Brgy. Manocmanoc.
Suno kana nga ro pagpanupod it eugtang ueumhan sa mga mangunguma nga owa it kaugalingon nga eugta ro unang tikang agud nga mabag-o ro pagpangabuhi it mga benepisyaryo.
Ro seremonya nga pagapangunahan ni Pangueong Rodrigo Duterte hay kaparte it pagpanupod it eugtang ueumhan it ahensya sa idaeum it Republic Act 9700 ukon mas kilaea bilang Comprehensive Agrarian Reform Program Extension Reforms Law.
Nasayuran nga ro Pangueo man ro nagpanupod it 523 nga Land Ownership Certificates sa 484 recipients kaibahan ro 45 nga miyembro it katutubong Ati ko Nobyembre 2018 ukon matapos nga uman nga buksan sa publiko ro Boracay halin sa 6 nga buean nga pagpasarado kara.
Samtang, ginpasugtan sigon it lokal nga probinsiya it Aklan ag banwa it Malay nga librehon sa environmental ag terminal fee patabok sa isla ro mga representative it mga magabaton it CLOA nga naga-abot sa kapin sa 219.
