KALIBO, Aklan—Kapin sa 2,000 nga mga kapulisan ro igapakalhit para sa week-long celebration it Kalibo Sto. Niño Ati-atihan Festival 2025 agud nga masiguro nga makaangkon it zero major crime incidents.
Raya ro ginpahayag ni P/Capt. Aubrey Ayon, public information officer it Aklan Police Provincial Office ukon APPO .
Agahon it Sabado hay ginpangunahan ni provincial director P/Col. Arnel Enrico Ramos ro send-off ceremony it first batch it mga pulis sa Camp Pastor Martelino .
Raya hay ginaeakipan it masobra sa 600 nga mga pulis halin sa 17 nga municipal police stations sa aklan ag daywang mobile forces .
Ro send-off ceremony suno kana para sa second batch hay pagahiwaton sa Enero 14 nga igapadaea it Police Regional Office ukon PRO-6.
Dugang pa ni P/Capt Ayon nga umpisa makaron nga adlaw hay igapakalhit eon ro nasambit nga mga pulis bangud sa pag-umpisa it nagkaeain-eain nga mga aktibidad para sa festival.
Ro Kalibo Sto. Nino Ati-atihan Festival, ginakabig nga “Mother of Philippine Festival” hay maga-umpisa sa January 13 ag magatapos sa January 19.
Ginpahayag dugang nga ro deployment hay sandig sa Major Event Security Framework it PNP.
Ro framework hay ginaeakipan it deployment it kapulisan sa festivity area ag sa mga lugar nga pasueod ag paguwa it Kalibo.
Ginaeakipan ro deployment it mga non-uniformed personnel, K-9 units, explosives and ordnance team kaibahan ro Special Weapon and Tactics.
