KALIBO, Aklan—Masobra sa 226 nga kapulisan ro gindeploy it Aklan Police Provincial Office sa nagkaeain-eain nga lugar sa bilog nga probinsiya agud nga masiguro nga malinong ag matawhay ro pagpatigayon it pinaka-ulihi nga State of the Nation Address ukon SONA ni Pangueong Rodrigo Duterte kahapon nga adlaw it lunes, Hulyo 26.
Suno kay Aklan police provincial director P/Col. Ramir Perlito Perlas nga ginpasiguro nanda nga maayos ro pagplastar it seguridad eabi eon sa mga places of convergence ukon mga matawong lugar rason nga owa man it nailistang kinagamo ag naging matawhay sa pangkabilugan ro sitwasyun sa Aklan samtang ginapatpat it Pangueo ro anang final SONA.
Sa pihak nga parte, owa man sanda it gineauman nga nagpatigayon it rally ukon mabahoe nga paghueag halin sa mga progresibong grupo bangud nga owa man it may nag apply it permit.
Nakaangkon sigon it sangkiri nga pagtililipon apang manageable man ro sitwasyun bangud sa pagbuylog ag pagsunod nanda sa mga otoridad.
Nauna kara, gin pahayag ni Col. Perlas nga hugut nanda nga ginatutukan makaron ro pagsunod sa minimum health standard agud nga matapna ro nagatinaas nga kaso it COVID 19.
Mas naging maeumo man sigon ro andang monitoring bangud sa mga gintukod nga border control checkpoints.
