KALIBO, Aklan—Kapin sa 24 ka mga kilohan ro natigayon nga nakumpiska sa ginpatigayon nga operasyon it Department of trade and industry ukon DTI kaibahan ro local government unit (LGU) sa Kalibo Public Market.
Sa nasambitan nga numero, kaabuan sa mga raya hay digital weighing scale.
Suno kay Carmen Ituralde, Officer in Charge it DTI-Aklan nga ro nasambitan nga tikang hay sandig sa mandato it office of the municipal treasurer sa banwa it Kalibo.
Sa makarun hay gindaea eun sa Office of the market master it LGU Kalibo ro mga nakumpisakang kilohan ag nakataeanang igapaidaeum sa inspeksyon ag kalibrasyon.
Engkasong mapamatud-an nga raya hay may gin-eabag sa ginapatuman nga pagsinoeundan it DTI, nakadepende eun sa opisina it Market master it LGU sa nasambitan nga banwa ro igapasaka nga penalidad sa mga nagbayolar.
May kaangtanan kara, uman nga nagpadumdom ro DTI-Aklan sa publiko nga kung nagaduda sa kilo it ginapamakae nga produkto hay indi magdaywang isip nga kilohon raya sa ginbutang nga kilohan it ahensiya sa kada public market.
Nasayuran nga sa kada banwa may unang gintaeanang daywang ka mga “kilohan ng bayan” ukon “timbangan ng bayan” ro DTI nga pwedeng gamiton it mga bumaeakae.
