KALIBO, Aklan—Kapin sa 25 nga mga mangunguma ro nagpaabot it reklamo sa Bombo Radyo Kalibo matapos nga masobra sa sang dag-on eon ro nagtaliwan hay owa pa sanda nakabaton it ginpromisa nga allowance halin sa Technical Education and Skills Development Authority ukon TESDA.
Suno kay Mrs. Albany Tocol, sambilog sa mga tagreklamo nga ko Hulyo 28, 2020 hay gin-recruit sanda para sa scholarship program ag nataw-an it kahigayunan nga makapaidaeum sa training it TESDA sa andang ginpatuman nga Training for Work Scholarship Program.
Si Elna Isada it Villa Maxselma Integrated Sustainable Organic Garden and Farm Field School ro nag-train sigon kanda kun sa siin naging bugana ro andang ani it paeay nga ginkalipay mismo it presidente it nasambit nga eskwelahan rason nga nagpa-litson raya.
Gindugang pa ni Tocol nga ginpromisahan sanda it 160 pesos nga daily training allowance ag 1,000 pesos nga health allowance sa ginapangatubang nga covid pandemic.
Apang hasta sa makaron hay owa pa raya na-release kanda ag pirme eamang sanda nga ginatug-anan.
Nag-abot sigon sa 14 diyas ro andang training, sang beses sa sang domingo.
Samtang, natukiban pa it nasambit nga mga mangunguma halin sa national office it TESDA nga owa sanda nakapa-enroll ukon nakapa-rehistro bilang benepisyaryo it programa ukon kwalipikadong trainees.
Maskin sigon natapos eon ro andang training hay owa man sanda nakabaton it anuman nga certification.
Sa pihak nga parte, nagapati si TESDA-Aklan head Ester Babalo nga posibleng ro andang training program hay bukon it sakop it TESDA scholarship.
Bukon it tanan nga mga gina-offer sigon nga programa ukon kurso it mga accredited nga eskwelahan hay sakop it scholarship program.
