Matapos ro pilang anyos nga pag-suporta ag pagtiis sa pagpangloko it mga Kumunistang grupo , uman nga nagbalik sa gobyerno ro masobra sa 25 ka mga supporters ag sympathizers it New People’s Army sa banwa it Libacao.
Suno kay PMaj Jose Marlon Murallo, hepe it libacao pnp nga kahapon kat personal nga nagpadueong ro masobra ukon komueang sa 25 ka mga indibidwal nga parehong mga residente it Brgy. Dalagsaan Libacao sa mismong panimaeay ni Punong Barangay Esmeraldo Onao agud uman nga magbalik sa gobyerno.
Bangud kara, intsigida man sigon nga nagpadueong ro mga tawuhan it Libacao Police Station , 1st Aklan Provincial Mobile Force Company sa pagpanguna ni PLTCOL ROGELIO L TOMAGTANG Jr. ag PLTCOL BERNARD P UFANO it Regional Intellegence Unit 6-Aklan ag mga myembro it 12 Infantry Battallion it Philippine Army sa nasambitang lugar.
Nasayuran nga naga-edad it 16 anyos eamang ro pinakabatang supporter it NPA KR-Panay samtang ro pinakamagueang kara hay 59 anyos.
Parehong mga mangunguma ro mga raya kung siin ginpromisahan sigon it mga armadong grupo nga pagabuligan kabaylo it andang suporta ag simpatiya.
Gindaea ro mga nagsurende nga persona sa Brgy Janlud Multi-purpose Pavement para sa berepikasyon ag validation kung siin kahapon it agahon hay nagpatigayon it pormal nga withdrawal of support sa kumunistang grupo.
Ginpangunahan man ro nasambitang aktibidad nanday Aklan PPO director PCOL Ramir Perlito Perlas, Atty. Flosemer Chris Gonzales ng DOJ ag NTF-ELCAC, LTCOL Joseph Jason Estrada it 12 Infantry Battalion it Phil. Army ag LGU Libacao sa pagpanguna ni Mayor Charito Navarosa.
