KALIBO, Aklan—Nakataeana nga maga-abot sa Agosto 30 ro maabu pa nga mga overseas Filipino workers halin sa Qatar nga nag-evacuate halin sa Afghanistan.
Suno kay Bombo International Correspondent Lorena Aurelio nga alas-12:00 it tungang gabi-i it Huwebes hay magabiyahe ro kapin sa 30 nga mga OFW halin sa Islamabad, Pakistan paagto sa Qatar.
Makaibahan sigon nanda ro indi pa masayuran nga numero it mga OFW nga idtu eon sa Qatar nga ginbakwit it military plane.
Sakay sanda it chartered flight ag magahugpa sa Ninoy Aquino International Airport sa Lunes nga adlaw.
Gindugang pa ni Aurelio nga base sa abiso kanda, pag-abot sa Manila hay magatinir pa sanda sa hotel para sa quarantine.
May ginpromisa man sigon ro gobyerno nga bulig sa tanan nga mga OFWs nga maga-uli halin sa Afghanistan matapos nga bumagsak it uman sa alima it mga Taliban militants kasunod it pag-pull-out sa mga tropa it Amerika sa nasambit nga nasyon.
Sa makaron hay ginatantiya nga 10 nga OFWs eon lang ro nabilin nga nagpa-aywan sa Afghanistan nga ginaeakipan it limang babaye ag sangka eaeaki sa Kabul ag ap-at nga eaeaki sa probinsiya it Mazar-i-Sharif nga padayun nga ginakumbinsi it embahada it Pilipinas sa Islamabad nga mag-evacuate eon.
Mabudlay eon man suno kana nga makasueod ro international flight makaron pasueod sa Kabul airport.
