KALIBO, Aklan–Ginatantya nga inde magnaba sa 30 ka panimaeay ro nadaeahig it sunog nga nag-eontad sa Sitio Cabanbanan, Brgy. Manoc-manoc sa isla it Boracay.
Suno kay Marvin Mosquera it Brgy. Estancia, Kalibo apang presenteng nagatrabaho sa nasambit nga isla nga bandang alas-5:45 it hapon kat nataeopangdan nga nagaaso ro daywang grado nga panimaeay.
Apang bangud sa mabaskog nga hangin ag ro kaeapit kara nga mga panimaeay ag boarding houses hay human sa mix materials, madasig nga nagkalhit ro kaeayo.
Mag-eowas kara, dukot-dukot sigon ro mga panimaeay sa nasambit nga lugar rason nga madasig nga nagbahoe ro kaeayo.
May kaangtanan kara, nagbueoligan ro mga residente sa pag-apula it kaeayo samtang uwa pa nakaabot ro Bureau of Fire Protection ukon BFP Boracay kaibahan ro iba pang fire fighter it mga maeagkuan nga estabilisyimento sa Boracay.
Bangud kara, ginaeauman nga maabong mga residente ag workers ro uwa eon it naabutan nga baeay ag mga kagamitan bangud nga ro kasagsagan it sunog hay sa trabaho pa ro mga raya.
Sa makaron hay nagapadayon pa ro imbestigasyon it arson investigator it BFP Boracay agud nga masayuran ro gintunaan it nasambit nga sunog.
