KALIBO, Aklan–Nakalista ro Provincial Disaster Risk Reduction and Management Council (PDRRMC)-Aklan it kapin sa 10,104 nga pamilya ukon 33,752 indibidwal nga naapektuhan kasunod it pagpanaeasa it bagyong Agaton.
Raya hay base sa initial assessment nga ginpasa it kada banwa sa taeatapan angot sa naging epekto it bagyo.
Suno kay Jeffrey Jizmundo, Operation and Warning Chief it PDRRMC-Aklan nga umpisa ko Martes hay ginpanaog eon nanda sa “blue alert” ro bilog nga probinsya ag gin-umpisahan eon nanda ro pagtipon it mga damage report halin sa kabanwahanan.
Apisar nga owa it masyadong pagtaas sa lebel it tubi sa Aklan river, nakalista gihapon it pilang pagbaha sa banwa it Altavas, Balete, Banga, Batan, Buruanga, Kalibo, Malay ag New Washington bangud sa pagbubu it mabaskog nga uean.
May kaangtanan kara, naka-record man ro PDRRMC it kabilugan nga 37 nga partially damaged nga panimaeay kung siin sambilog ro nailista sa Banga ag 36 sa New Washington samtang sambilog ro totally damaged.
Ginpahayag pa ni Jizmundo nga owa it nailistang casualty ukon missing sa pagtama it bagyo kamana man nga padayun pa nandang ginahueat ro report angot sa damage assessment sa agrikultura ag iba pa.
Umpisa sigon ko adlaw it Dominggo hay naka-alerto eon ro andang opisina kaeakip ro MDRRMO sa kada banwa ag iba pang ahensya it gobyeno para magmonitor sa daeagan it bagyong Agaton.
