KALIBO, Aklan–Naga-abot sa 38 nga motorsiklo ag tatlong topdown ro nadakpan it mga katapo it Malay municipal police station sa ginkasa nga tatlong magkaseparadong adlaw nga Anti-Colorum operation sa isla it Boracay.
Suno kay P/Lt. Col. Don Dicksie de Dios , hepe it malay municipal police station nga ginpatigayon ro operasyon base man sa mandu it department of the interior and local government ukon DILG-6 matapos nga mataeupangdan ro uman nga pag-inabu it mga motorsiklo nga iligal nga nakasueod sa boracay ukon owa it permit to transport.
Gusto sigon nanda nga mapatuman it husto ro Article 18 it Municipl Traffic Code ukon ro Special Permit to Transport Vehicles sa isla.
Naging kabulig sa operasyon it Malay PNP ro Municipal Transportation Regulatory Office ag Malay Auxialiary Police.
Magapangatubang suno kana ro mga tag-ana it unregistered motorcycles it multa nga 500 hasta 2,500 pesos ag iga-impound ro andang mga saeakyan sa mainland malay.
Ginpasiguro man ni de Dios nga magiging dere-deretso eon ro andang operasyon kontra sa mga colorum nga motorsiklo.
Tuyo man sigon kara nga maprotektahan ro mga sumaeakay.
Mag-eowas kara, mas pang ginpabaskog it kapulisan ro pagbantay sa mga baybayon it boracay agud nga madakpan ro mga nagapa-eusot it motorsiklo nga owa it sticker ag mga indibidwal nga owa it nagakaigo nga QR code.
Sa pangkabilugan hay nagapabilin nga malinong ag matawhay ro bilog nga isla it boracay nga ideal sa mga gustong magbakasyon ukon magrelax.
