KALIBO, Aklan—Kapin sa 4,204 nga kapulisan ro iga-deploy sa bilog nga Western Visayas para sa eowas nga obserbasyon it All Saints Day ag All Souls Day ukon pista minatay suno sa Police Regional Office ukon PRO-6.
Suno kay P/Maj. Mary Grace Borio, tagapaghambae it PRO-6 nga owa pa naeakip sa nasambit nga numero ro mga force multipliers nga naga-abot sa 9,888, mga volunteers halin sa mga civic organizations, barangay tanod ag iba pa.
Magabutang man ro PNP it mga police assistance desks sa prente it mga sementeryo ag sa mga lugar nga eubus sanda nga kinahangean.
Samtang, owa man sigon it may natumod nga magiging paeag sa seguridad sa nagahilapit nga pista minatay.
Apang, uman nga ginpadumdum ni Maj. Borio ro publiko nga hugut sa gihapon nga sundon ro minimum health standard sa pagbisita sa mga sementeryo.
Ro mga makahieilong nga ilimnon, pagsigarilyo, baraha ag iba pang gambling items, mabaskog nga speakers, ag mataeum nga hinganiban ukon deadly weapons hay hugut nga ginabawae.
Kinahang-ean man nga ro mga nagabisita hay magdaea ag magsuksok it face masks sa tanan nga oras.
Bangud sa haeos daywang dag-on nga nakaangkon it restrictions sa mga hueag it tawo tuga it COVID-19 pandemic, ginaeauman nga magabuhos ro mga tawo makaron nga paniempo sa mga sementeryo matapos nga ginpasugtan eon ro face to face nga pagbisita.
Ro security plan para sa Undas 2022 hay maga-umpisa sa Oktubre 28 hasta Nobyembre 2.
