KALIBO, Aklan—Kapin sa 44 nga miyembro it Aeta community sa isla it Boracay ro nagapameligro makaron nga mabawian it Certificate of Land Ownership.
Raya hay kasunod sa pagpabor it Department of Agrarian Reform ukon DAR sa resolution of protest it claimant it eogta nga gin-award kanda ko dag-on 2018 sa kasagsagan it Boracay rehabilitation nga mismong si dating pangueong Rodrigo Duterte ro nagpasaalima kanda it kinamatarong nga okupahan ag panag-iyahan ro eogta nga makit-an sa Sitio Angol, Brgy. Manocmanoc sa idaeom it Comprehensive Agrarian Reform Program ukon CARP it nasambit nga ahensya.
Suno kanday Romalyn Supetran ag Maria Tamboon, coordinator it Boracay Ati Tribal Organization nga antes pa man gin-award kanda ro eogta hay sayod sanda nga may claimant ag nagakabaeaka nga magkaproblema sa ulihi rason nga ginpamalibaran nanda raya.
Apang, mismong ro gobyerno eon ro nagpaeapit kanda ag gintanyag ro nasambit nga grasya rason nga ginbaton nanda raya ag ginpasaeamatan.
Insigida sanda nga naghimakas nga hawanan ro lugar ag nagpananom nga anda eon makaron nga ginaboe-an it pangabuhian.
Ro makasueobo eamang suno kanda hay mismong ro DAR pa ro naghambae nga uwa it maibulig sa andang problema bangud nga may nagapanag-iya sa eogta.
Masakit para kanda nga matsa ginpahueam it hampangan ag bawion dayon sa kaulihanan nga nagresulta sa pagtapak sa andang pagkatawo ag dignidad bilang mga tumandok it isla.
