KALIBO, Aklan–Nakaangkon it partial damage ro sangka daywang garadong baeay matapos ro nag-eontad nga sunog sa Villa Salvacion, Brgy. Andagao, Kalibo kaina it aga-aga.
Ro nasambit nga panimabaeay hay ginapanag-iyahan ni Mr. Jomar Legazpi, tumandok it banwa it Madalag.
Suno kay FO1 Janryl Magno it Kalibo fire station nga insigida sandang nagresponde sa lugar matapos nga makabaton it tawag angot sa nagtuhaw nga sunog.
Kabulig sigon nanda sa pagresponde sa area ro mga katapo it Municipal Disaster Risk Reduction Office (MDRRMO) ag Kalibo PNP kun siin madinaeag-on man nanda nga natapna ro kaeayo.
Base sa inisyal nga imbestigasyon, ginapatihan nga nag-umpisa ro kaeayo sa naaywan nga baga sa dirty kitchen it pamilya Legazpi nga himo sa light materials.
Ginasugid nga nag-eaha pa ro pamilya ko adlaw it Sabado antes nag-uli sa Madalag.
Owa sigon it tawo sa baeay kat matabo ro sunog bangud gina-adtunan eamang nanda raya kada nagapatigayon it online class ro andang unga.
Samtang, nakalista ro Bureau of Protection (BFP)-Kalibo it kapin sa P50,000 nga danyos matapos ro natabo nga sunog.
