KALIBO, Aklan—Ginatantiya nga 50 eon nga katawo ro namatay sa mga lugar nga gindaeasa it hurricane Ida partikular sa New York City ag New Jersey.
Suno kay Bombo International Correspondent Cha Reyes nga kaabuan sa mga namatay hay naeumos matapos ro grabeng pagbaha kaibahan eon kara ro mga namatay sa andang mga basements kasunod it ginakabig nga “historic” weather event nga suno sa mga opisyal hay bangud sa climate change.
Ginpahayag dugang nga bangud sa mabaskog nga hangin ag uean, nagresulta raya sa gulpiyadang flash flood eabi eon sa New York City kun sa siin medyu naging suba ro andang mga kalye ag gin-shut down man ro mga subway services matapos nga sue-ubon raya it tubi-baha.
Makabig sigon nga tragic ro pagkamatay it mga biktima bangud nga kaabuan kanda hay na-trap sa andang mga saeakyan ag basements it andang mga baeay.
Sa pihak nga parte, eowas man sigon ro mga Pinoy sa andang lugar sa Maryland maskin nga ginbaha man ro andang lugar.
Haeos nakabangon eon sigon ro mga naapektuhan nga estado bangud sa madasig man nga paghueag it gobyerno.
Sa pihak nga parte, gindugang pa ni reyes nga ginatun-an eon man sigon nanda nga magpangabuhi makaron it normal kaibahan ro coronavirus disease 2019 ukon covid 19.
Suno kana nga kon fully vaccinated hay owa eon masyadong gina-require ro pagsuksok it face mask mag-eowas eamang sa mga supermarkers, mga ospital ag mga building nga gina-obligar ro tanan sa pagsuksok kara.
