KALIBO, Aklan—Nagpaandam ro Aklan Police Provincial Office (APPO) sa publiko nga indi maging biktima it mga investment scam.
Raya hay kasunod it napabalitang kapin sa 500 nga mga Aklanon ro nabiktima it ginasugid nga investment scam sa Capiz, ro Double Your Money scam nga naga-abot sa masobra sa P29 milyon.
Pila sa mga gina-alegar nga nabiktima it scam ro mga negosyante, pilang miyembro it media ag iba pa.
Suno kay Police Major Willian Aguirre, assistant unit chief it Provincial Investigation and Detective Management Unit it APPO nga dapat maging mapagbantay ro tanan ag indi magpadaea sa mga matam-is nga promisa agud malikawan ro mga scam.
Ginakinahang-ean man suno kana nga sikyaron kung naka-rehistro ro mga raya sa Securities and Exchange Commission, Bangko Sentral it Pilipinas ag iba pang natungdan nga ahensya it gobyerno.
Kadungan kara, nag-apela si Major Aguirre sa publiko nga insigidang i-report sa pulisya ro mga tawo ukon kompaniyang eakot sa investment scams.
