KALIBO, Aklan —Ginaeauman it Malay Municipal Tourism Office ro kapin sa 58,000 nga mga turistang magabisita makaron nga Semana Santa sa isla it Boracay.
Suno kay Malay Chief Tourism Operations Officer Felix delos Santos, sa pihak it nakataeanang pagpasara sa isla, mabahoe sigon ro posibilidad nga makalista pa sanda it 5% nga pagtaas sa tourist arrivals ukon kapin sa 58,040 nga bakasyunista kumpara sa kaparehong period ko nagtaliwan nga dag-on nga nag-abot sa 54,887.
Raya hay ginakaeakipan it 19,490 nga dumueoong, 34,613 ro lokal nga turista ag 784 ro overseas Filipino workers (OFW).
Maeapit eon lang sigon nga maabot ro nasambitang numero bangud sa padayon nga pagbuhos it mga turista kapin eon ro mga Koreano ag Chinese.
Sa pihak nga parte, ginpadumdom ni delos Santos sa mga bakasyunista nga hugot nga ginabawae ro pagsilinangag ag ro waea-tuo nga party sa bilog nga isla umpisa alas-6:00 it agahon sa Biyernes Santo hasta it alas-6:00 it agahon sa Sabado de Gloria base sa ginapatuman nga ordinansa.
Samtang, hugot nga seguridad ro ginapatuman makaron sa Cagban ag Caticlan jetty ports agud masiguro ro kaeowasan ag seguridad it mga turista.
Bisan sigon si Environment secretary Roy Cimatu hay nasaksihan ro pag-abot it mga turista.
Apisar nga tyempo it Semana Santa, nagapadayon ro inspection it sekretaryo kaibahan si Aklan Governor Florencio Miraflores.
Panibag-ong mga pipes ukon tubo halin sa mga establishimento komersiyal nga iligal nga naka-konekta sa drainage system ro nadiskubre sa ginpatigayong inspection sa Sitio Manggayad, Barangay Balabag.
Kat buksan ro drainage, mga masebung tubi ag kitchen waste ro nakit-an nga ginapaguwa it mga tubo nga ro sambilog hay sa sangka mabahoe nga hotel.
