KALIBO, Aklan–Kapin sa 600 ka mga job seekers ro nag-apply sa ginpatigayun nga job fair it Kalibo PESO sa bahin it Aklan Catholic College (ACC) covered court kahapon, Setyembre 10.
Ro Bagong Kalibo Job Fair 2022 “Trabaho, Negosyo at Kabuhayan” hay ginpangunahan it lokal nga gobyerno kaibahan ro nagkaeain-eain nga ahensya.
Ginpahayag ni John Marden Maigue, Kalibo PESO Manager nga naga-abot sa 45 ka mga kompaniya kaibahan ro Bombo Radyo Kalibo ro nagpartisipar sa ginhiwat nga job fair.
Ginakaeakipan raya it mga local ag overseas company kamana man nga may mga POEA agency nga nagpartisipar.
Ro nasambit nga job fair hay bukas para sa tanan nga naga-usoy it trabaho.
Nailista ro mga job vacancies sa hotel, BPO company, sales/marketing, skilled worker, domestic helper, driver ag manugturo.
Nasayuran nga raya ro unang kahigayunan nga uman nga nagpatigayun it job fair ro banwa matapos ro masobra daywang dag-on it pagpanaeasa it pandemya.
