KALIBO, Aklan—Presenteng nakapaidaeom sa lockdown ro kapin sa 68 ka mga panimaeay sa sangka porsyon it Sitio Minoro nga sakop it Brgy. Camaligan, Batan.
Suno kay Punong Barangay Rolly Sucgang it nasambit nga lugar nga kapin sa 25 pa it anang kasimaryo ro naka-isolate sa andang tagsa ka panimaeay matapos nga magpositibo sa COVID-19.
Bangud sa punuan eon ro mga quarantine facility, gindesisyonan sigon nanda nga ipadaeom eon lang sa home quarantine ro mga pasyente.
Ginpahayag ni kapitan nga ro nasambit nga porsyon it Sitio Minoro ro ginakabig nga critical zone bangud maabo sa mga residente ro nagpositibo sa deadly virus ag haeos magpamilya eamang.
Padayun man sigon ro andang pagtinguha agud nga makatao it ayuda partikular it food packs sa mga apektadong pumueoyo.
Nakataeana sigon nga magtapos ro isolation it pila sa mga pasyente sa Agosto 17.
Ro Brgy. Camaligan hay nakalista it kabilugan nga 31 nga kaso it COVID-19 kun siin tatlo ro namatay.
