KALIBO, Aklan—Kapin sa 70 nga mga pulis nga may igbata nga nagakandidato sa maabot nga Barangay ag Sangguniang Kabataan Elections sa Oktubre ro ginsaylo eon it puwesto sa probinsiya it aklan.
Suno kay P/SSgt. Jane Vega, tagapaghambae it Aklan Police Provincial Office ukon APPO nga ginaeauman eon sigon it mga pulis ro makarondaya nga standard operating procedure ukon SOP agud nga malikawan nga maeakot sa anuman nga partisan politics.
Sakop sigon it patakaran it PNP ro hasta sa 4th degree nga igbata it kandidato ukon ro mga pulis nga maeapit sa kandidato.
Ginklaru ni Vega nga ro re-assignment ukon swapping it mga pulis sa pihak nga munisipalidad hay temporaryo eamang hasta nga matapos ro eleksyon agud nga malikawan nga maimpluwensiyahan ro mga botante ag maging rason it anuman nga gulo.
Samtang, ro nasambit nga numero hay posible pa suno kana nga madugangan sa nagapadayun nga validation ag assessment.
