KALIBO, Aklan—Kapin sa 74 nga mga baeay sa sangka Sitio sa Barangay Calangcang, Makato ro ginpaidaeum sa pitong adlaw nga lockdown matapos nga maglista it pilang kaso it Coronavirus Disease 2019 ukon COVID-19 sa nasambit nga lugar.
Suno kay Punong barangay Niel Tumbukon it Calangcang, Makato nga ginpaidaeum sa lockdown ro bilog nga sitio bukbok ko Mayo 21 ag magatapos sa Mayo 28 it alas-3 it hapon.
Ginsaysay ni kapitan tumbukon nga ko Mayo 10, sangka 54 anyos nga babayeng residente halin sa Sitio Happy Village sa nasambit nga barangay ro namatay bangud sa sakit nga diabetes.
Kasunod kara, nagmasakit man ro 68 anyos nga babaye nga nag-alaga kana ag kat ginpaidaeum sa rapid test hay natukiban nga positibo raya sa deadly virus.
Bangud sa insidente, ginpa-cremate eon lang ro bangkay it namatay.
Sa ginpatigayon nga contact tracing, 22 ro natumod nga nakaangkon it close contact sa mga covid positive ag kat ginpaidaeumn sa RT-PCR test hay pito sa mga raya ro nagpositibo.
Bangud kara, gindesisyunan it barangay council nga irekomenda sa lokal nga gobyerno nga ipaidaeum sa lockdown ro pilang baeay sa Sitio Happy Village ag Sitio Borderline agud nga matapna ro pagkalhit it virus kun sa siin pilang residente ro gin-qauarantine matapos makitaan it sintomas.
Sa makaron suno kana hay natapos eon ro lockdown sa mga baeay it daywang sitio ag nagapamayad eon ro mga naka quarantine nga pilang pumueuyu.
Sa makaron ro Barangay Calangcang hay may kabilugan nga 22 nga posiitibong kaso ag daywa ro namatay.
Sangka 64 anyos nga empleyado it Agriculture Department it LGU-Makato nga residente it sitio bukbok ro pinaka-ulihing nagpositibo sa sakit.
Bangud sa pagduda, personal sigon raya nga nagpa rapid test sa sangka pribadong klinika ag nagpositive.
Uman raya nga ginpaidaeum sa RT PCR test ag nagpositibo man rason nga temporaryong ginsaraduhan ro munisipyo it nasambit nga banwa para sa disinfection.
Sa pihak nga parte, sangka 79 anyos nga residente it Sitio Eambon ro panibag-o nanda nga namatay bangud sa covid infection.
Presente sigon raya nga presidente it senior citizens sa barangay.
Dead on arrival ro pasyante sa Aklan Provincial Hospital ko nagtaliwan nga gabi-i nga gin trangkaso eamang hasta nga nag euya.
