Kalibo Aklan———–Masobra sa 84,000 nga mga unga nga naga-edad it lima hasta onse anyos ro target mabakunahan kontra COVID-19 sa probinsiya it Aklan.
Suno kay Dr. Cornelio “Bong” Cuatchon, Jr. it Provincial Health Office ukon PHO-Aklan nga umarangkada eon ro rollout it bakuna ko Martes nga adlaw, Pebrero 15, 2022 sa NVC gymnasium , kun sa siin , nabakunahan ro 365 ag ko Miyerkules hay 107.
Target sigon nanda nga mabakunahan ro 500 nga mga unga kada adlaw.
Sa makaron hay may schedule eon man ro mga rural health units sa kada banwa kon hin-uno paga-umpisahan ro andang pediatric vaccination 5 to 11 years old.
Nauna eon nga ginlunsar ro resbakunakids sa aklan sa isla it boracay ko nagtaliwan nga domingo , kun sa siin may pilang mga unga ro nagbaton it unang dose.
Hugut man nga ginpadumdum it PHO nga kinahangean nga magparehistro anay agud nga makabaton it schedule sa pagbakuna.
Uman imaw nga nag apela sa mga ginikanan ukon guardians nga pabakunahan ro andang mga unga agud nga makaangkon it proteksyon kontra sa deadly virus.
Samtang, naga-abot eon sa masobra sa 359,000 ro fully vaccinated sa Aklan.
Apang ro nakabaton pa eamang it booster shot hay naga-abot sa masobra sa 37,000 ukon 7.6% .
Importante suno kana ro booster dose para sa dugang nga proteksyon sa anuman nga variant it deadly virus.
