KALIBO, AKLAN — Kapin sa 90 mil pesos nga cash ag mga alahas ro natigayun nga mabo-oe sa mag-asawa matapos mabudol-budol it mga ating manugbueong.
Suno sa 43 anyos nga biktima ag sangka negosyante, nagpabutbot sigon sandang mag-asawa sa nasambitang mga ati.
Base sa report, nag abot ro daywang ka mga ati sa panimaeay it mag-asawa ag nagtanyag nga magbueong nga may bayad nga 1,700 pesos.
Gin hayag sigon it mga suspek nga may mga duwende sa baeay it mag-asawa rason nga nagtratong magabalik sa adlaw it Biernes.
Kabie sigon kat magbalik ro mga ati agud boengon ro mag-asawa pinaagi sa orasyon.
Sa kasagsagan it pagbueong kat magpangayu ro mga suspek it 90 mil pesos, pitong mga alahas, pitong prutas, ag pitong kandila nga gin butang sa t-shirt nga gin tahi.
Gin paligid-ligid sigon ro nasambitan nga t-shirt sa andang mga eawas.
Matapos ro tunga sa oras nga paghigot it nasambitan nga t-shirt sa eawas it eaeaki hay naghalin eon ro mga suspek.
Kat chekyaron ro t-shirt, nakibot eon lang ro mag-asawa nga mga pira-pirasong papel eon lang ro sueod kara.
Gina sugid nga ro mga suspek hay puros mga babaye nga naga edad it 35 anyos samtang, ro sambilog kanda hay nabdos.
Gina alegar nga may makarondaya eonman nga kaso nga gina eakutan ro mga ati sa mga banwa it Pandan ag Culasi, Antique.
Sa makaron hay padayun nga gina imbestigahan it mga katapo it Numancia Municipal Police Station ro nasambitan nga insidente.
