KALIBO, Aklan—Kapin sa 93 nga mga Filipino ro gustong magbalik sa Pilipinas halin sa Haiti.
Raya ro ginpahayag ni Fatima Irodistan Sylvain, Bombo International Correspondent sa nasambit nga nasyon bangud sa padayun nga pag-grabe it kinagamo sa nasambit nga nasyon.
Base sa group chat it Filipino community sa nasambit nga nasyon, ginpahayag ni Sylvain, tumandok it Barangay Andagao, Kalibo, Aklan ag nakapangasawa it sangka Haitian nga sa nasambit nga numero, 35 ro nakataeana nga iga-repatriate samtang ap-at nga iba pa ro naka-pending ag kinahangean nga makompleto ro registration form.
Kadungan kara, ginahinyu ro iba pang mga pinoy nga magpa-rehistro agud nga matumod it Philippine Embassy sa Washington ro ensaktong numero it mga Filipino nga naga-istar sa Haiti.
May una eon sigon nga nakaplastar nga mga cross ag contingency plans agud nga magbulig sa mga pinoy nga naigpit sa kinagamo.
Madumduman nga nauna eon nga ginpaidaeum sa state of emergency ro Haiti kasunod it bakbakan it mga gangs ag pag-atake sa mga presuhan rason it pagtakas it pilang libo nga mga preso sa Port-Au Prince.
Kasunod it pag-grabe it sitwasyon, haeos tanan nga mga taeatapan ag establisimento sa nasyon hay sarado.
Makaeoeo-oy sigon ro mga residente nga owa it stock nga pagkaon bangud nga masyadong peligroso kon magguwa it baeay.
Nagabueuligan sigon ro mga Filipino idtu nga owa it makaon.
Gusto it mga lider it nagapangunang gang sa capital it Haiti nga pahalinon si Prime Minister Ariel Henry.
Samtang, maskin nga nagpirma eon it anang resignation, apang owa pa eubusan nga gina-aywan ni Henry ro anang pwesto ag ginahueat pa sigon ro pagbilog it presidential transition committee.
Tatlong indibidwal ro nagahandum makaron nga maging masunod nga lider it Haiti nga puro mga gangster.
Madumduman nga si Sylvain hay naka-uli eon sa aklan kaibahan ro anang kamanghuran nga unga bilang refugee agud nga makalikaw sa anuman nga trahedya.
