KALIBO,Aklan–Kapin sa napueo eon ka barangay sa banwa it Kalibo ro apektado it African Swine Fever ukon ASF virus.
Mag-eowas kara, ginpahayag ni Mr. Uriel Las Piñas it Municipal Agriculture Office it LGU Kalibo nga may an-om pang blood sample sanda nga ginahueat nga posibleng positibo man dato sa ASF.
Maeapad eon suno kana ro naapektuhan it virus kon sa siin maabo man ro mga baboy nga andang ginpaidaeom sa culling.
Angot kara, ginapahaom eon sigon nanda ro masterlist it mga apektadong hog raisers kon sa siin prayoridad nanda nga maayudahan it una ro mga ginculling ro andang sapat.
Sa pihak nga parte, uwa it ginpaguwa nga restriction ro LGU Kalbo angot sa pagdaea it karne it baboy it mga eskursyunista nga magadayo sa mga baybayon ag resorts nga sakop it banwa.
Raya hay matapos nga una eon man sa red zone category ro Kalibo bangud sa ASF virus.
