KALIBO, Aklan—Naga abot sa kapin sa P100,000 pesos nga cash ag mga alahas ro natigayon nga matakaw it mga owa pa nakilaeang suspek matapos nga sudlon ro sangka boarding house sa Brgy. Yapak sa Isla it Boracay.
Suno kay Mrs. Hazel Bandiola, manugturo sangka eskwelahan sa lugar nga mabahoe ro andang pagpati nga sa katung-anan it alas-9:00 hasta alas-10:00 it agahon kahapon it Miyerkules sa kasagsagan it mabaskog nga uean ginsueod it mga mga kawatan ro boarding house it biktima.
Ginwasak ukon ginlaslas ro chicken wire sa andang bintana ag direktang ginpuntirya ro cash box nga nakatago sa ubos it andang kama.
Nagapati ro biktima nga kabisado it manakaw ro sueod it andang baeay ukon familiar imaw sa lugar bangud nga mag-eowas nga owa nakitaan it forcible entry hay owa man raya nag-ukay it mga gamit.
Sueod it cash box ro mga tinipon nana nga kwarta kun sa siin ro iba hay pagagamiton kunta sa selebrasyon it 88th birthday it anang ama nga paga obrahon nga money cake samtang ro sambilog sa tinakaw nga kulintas hay iga-regalo nana sa kaadlawan it anang unga.
Ro insidente hay insigidang gin report sa Malay Municipal Police Station.
Mag-eowas sa pag post sa social media, nagpangayo man imaw it bulig sa mga pawnshop sa Boracay sa pageaum nga maibalik pa ro anang mga alahas.
