Kapin sa P120-K, nailistang danyos matapos nga masunog ro sangka porsyon it ika-pitong panaegan it sangka pribadong ospital sa Kalibo

KALIBO, Aklan–Ginabuebanta nga naga-abot sa P120,000 ro naging danyos it nagtuhaw nga maisot nga sunog kabi-i sa sangka porsyon it 7^th floor it sangka pribadong ospital sa banwa it Kalibo.

Suno kay Fire Inspector Carlos Magbanua, Deputy Municipal Firemarshall it Bureau of Fire Protection (BFP)-Kalibo nga pag-abot nanda sa lugar hay asu eon lang ro nabilin ag sangkiri nga baga.

Indi pa sigon matumod ro mismong ginhalinan it kaeayo apang ginapatihan nga electrical in nature ro rason kara.

Nasayuran nga ro area kung siin nagtuhaw ro sunog hay nagaserbing storage it mga medical equipment ag supply it ospital.

Sa makaron hay nagapadayun pa ro imbestigasyon it BFP sa nasambit nga insidente.