KALIBO, Aklan—Kapin sa P200 milyon ro standby fund it Aklan provincial government nga gin-aprubahan it Sangguniang Panlalawigan nga nakataeana para sa pagbakae it bakuna kontra covid-19 sa oras nga maging available eon raya sa nasyon.
Suno kay Aklan first district board member Nemesio Neron, maskin anu sa ap-at nga bakunang ginakaeakipan it Sinovac nga himo it China, Astrazeneca nga ana it United Kingdom, Moderna ag Pfizer/biontech nga himo it US hay haom ro gobyerno probinsyal nga magpurchase kara ro gobyerno para sa mga Aklanon nga kon sa siin prayoridad nga mabakunahan ro mga vulnerable sa deadly virus kaparehas it mga frontliners, senior citizen ag mga kubos nga pumueoyo.
Ginpabugae man kara ro pagiging aktibo ko mga opisyales it probinsya sa pagtapna sa pagkalhit it sakit bangud nga haeos sa mga natamaan hay nagmayad eon ag sangkiri eamang ro casualties kon ikumpara sa ibang probinsya.
Sa oras suno nga maging available eon ro bakuna hay uwa it magiging problema ro probinsya bangud nga may bastanteng pondo nga nakataeana ro gobyerno para kara.
Ro nasambit nga kantidad hay presenteng una sa bangko ag iga-widraw raya sa oras nga kinahang-eanon eon.
Sa pihak kara, gin-insister it opisyal ro padumdom it mga health authorities nga maskin may bakuna eon kontra sa sakit hay inde gihapon magpakampante bangud nga virus ro kontra.
Ugalion eon ro pagsuksok it face mask ag face shield kamana ro paghugas it alima gamit ro sabon ukon magdis-infect gamit ro alcohol.
