KALIBO, Aklan—Hugut nga ginabawae ag ginaprotektahan ro mga tree species nga nagakabuhi sa timberland areas sa probinsya ag sa iba pang bahin it nasyon.
Raya ro pahayag ni Engr. Jurlie Zubiaga, Officer in Charge it Provincial Environment and Natural Resources (PENRO)-Aklan matapos nga makumpiska sa operasyon it kapulisan ro ginatantiya nga P216,000 nga balor it Agar Wood ukon Lapnisan sa Sitio Angeles, Barangay Kinalangay Viejo, Malinao, ko Disyembre 29, 2023.
Suno kana, hugut nga ginabawae ro pagbo-oe it mga derivatives ag mga materyales.
Nagakadapat nga proteksyunan ag gina-amligan ro mga natural resources para sa presente ag masunod nga mga henerasyon.
Madumduman nga naaresto ro 10 nga suspek nga kapin sa 1.35 kilos nga Agar wood ro na-intercept.
Mag-eowas pa kara, nakumpiska man kara ro sampling seedlings it lapnisa.
Ro mga suspek hay nagapangatubang makaron sa kasong pag-eabag sa Republic Act 9147 ukon Wildlife Resources Conservation and Protection Act ag Presidential Decree 705 ukon Revised Forestry Code of the Philippines.
Suno pa kay Zubiaga, raya hay may haega bangud sa kakaiba nana nga hugum ag ginagamit sa pag-obra it insenso, perfume, ag medicinal products.
Nag-apela man si Zubiaga sa mga naga-istar sa upland communities nga makipag-angot sa andang taeatapan ukon mga natungdan angot sa mga iligal nga aktibidad.
