KALIBO, Aklan—Ginkumpirma it Philippine Charity Sweepstakes Office (PCSO-Aklan) nga ro manugtaya halin sa banwa it Banga ro andang panibag-ong milyonaryo matapos tamaan ro masobra sa P246-milyong pesos nga Ultra Lotto 6/58 jackpot kahapon it Biyernes.
Raya ro ginpahayag ni John Martin Philemon Alipao, Financial Management Officer I it PCSO-Aklan Branch pinaagi sa text message.
Natumbok it masuwerteng manugtaya ro winning combination nga 24-09-32-41-29-22 ag nagdaog it kabilugan nga P246,085,102 milyon pesos.
Samtang, sa pakikipag-angot it Bombo Radyo, nagpamalibad nga magtau it dugang nga detalye ro tag-ana it lotto outlet kun sa siin nagtaya ro solong nagdaog it jackpot.
Nasayuran nga raya eon ro ikaywang beses nga may nagdaog nga manugtaya ag naging instant milyonaryo sa nasambit nga lotto outlet nga nahamtang maeapit sa Banga Public Market.
Ro 6/58 lotto hay ginabola kada adlaw it Martes, Biyernes ag Domingo.
