KALIBO, Aklan—Aprubado sa ginpatigayun nga session it Sangguniang Bayan it Kalibo ro ginproponer nga P50 million nga pondo para sa pagbakae it bakuna kontra Coronavirus Disease 2019 ukon COVID-19.
Suno kay Kalibo SB member Augusto Tolentino ginpaboran it haeos bilog nga konseho ro nasambit nga proposisyon.
Mismong ro budget officer pa sigon ro nagsuhestiyon nga dugangan ro pondo para sa bakuna.
Engkaso sigon nga kueangon ro kwarta it munisipyo hay bukas sanda sa posibilidad nga mag-utang sa bangko.
Tuyo sigon kara nga mabakunahan ro mga pumueoyong Kalibonhon bilang proteksyon kontra deadly virus.
Sa pihak nga parte, gintaw-an it punto ni Executive Assistant to the Mayor Mr. Basil Tabernilla nga ko Enero 7 nagpatigayun it meeting si Mayor Emerson Lachica para maistoryahan ro mga tikang nga pagahimuon sa oras nga makaangkon eon it rollout it bakuna ro gobyerno.
Ro P10 million sigon nga naunang gin-alokar it lokal nga gobyerno hay para sa initial batch it bakuna para sa mga prayoridad nga sector nga pagaturukan.//Ro paga-unahon sigon nga mataw-an kara hay ro mga frontliner, senior citizen ag pobreng residente it Kalibo.
Ginabuebanta nga indi magnaba sa 86,000 ro kinahang-ean nga mabakunahan.
May kaangtanan kara, nagbilog it sangka Working Committee ro LGU para magpanguna sa administrasyon it pagpurchase it bakuna ag pagpanupod kara sa mga prayoridad nga indibidwal.
Samtang, nagapadayon man ro andang koordinasyon sa National Task Force para masiguro nga nagasunod sa protocol ag mataw-an it prayoridad nga makaangkon it bakuna.
