KALIBO, Aklan—Ginapahauman eon it gobyerno probinsyal ag Malay Tourism Office ro ginaeauman nga pagbisita it high-end cruise ship nga MS Seabourn Encore sakay ro inde magnaba sa 400 nga European tourist nga nakataeana ro andang pag-abot sa Pebero 13.
Suno kay Mr. Nieven Maquirang, executive assistant IV it Office of the Governor, raya ro unang cruise ship nga magadungka sa Boracay matapos ro daywang dag-on nga pandemya.
Mag-eowas sa nasambit nga high-end vessel, pagasundan man raya it iba pang cruise ship arrival sa March 3, March 6 ag March 8 nga puro European tourist ro magiging pasahero it mga raya.
Suno pa kay Maquirang, magabuhay ro mga turista sa paglibot sa isla it waeong oras antes raya nga magadiretso sa Palawan.
Sa makaron suno kana hay ginasapinal eon nanda ro mga health protocols nga igapatuman rason nga makaangkon sanda it pueong sa tunga it Bureau of Quarantine, immigration sa Manila ag port operators para masiguro nga magiging maayos ro arrival it nasambit nga mga turista.
Kapin sa waeong cruise ship ro ginaeauman nga magaabot sa Boracay makaron nga dag-on nga magadaea it ginatos ka mga dumueoong turista.
Samtang sa pihak nga parte, ginaeauman eon man ro pagbalik it mga turistang Chinese sa buean it Pebrero rason nga ginasaligan nga tayuyon ro pagbuhi sa industriya it turismo sa Boracay matapos ro paghagan-hagan it pandemya.
