KALIBO, Aklan–pisar nga owa pa it kompletong breakdown it figure kung pila ro kabilugan nga kinita it barangay, aminado man si Punong barangay Niel Candelario it Poblacion, Kalibo nga mabahoe ro naging bulig kanda it kakatapos eamang nga selebrasyon it Kalibo Sr. Sto. Niño Ati-atihan Festival 2023.
Suno kay Kapitan Niel nga nagtao sanda it special permit and clearances para sa mga stall ag ambulant vendor.
Kung siin, nagdeploy sanda it daywang team nga in-charge sa pagpanukot sa mga raya.
Sa makaron hay initial figure pa eamang ro andang buyot base sa mga gin-isyu nga resibo bangud owa pa ma-consolidate ukon nagsueod ro iba.
Engkaso nga matapos eon ro paghuyap, posibleng sa masunod eon nga dag-on magamit ro pondo para sa mga programa ag proyekto it barangay.
Malipayon man ro opisyal bangud uman nga nabuhi ro pagnegosyo sa banwa matapos ro daywang dag-on nga pagpaiway it kapiestahan tuga it pandemya.
Ginpasaeamatan man kara ro tanan nga barangay official, volunteers ag force multipliers nga nagbulig sa pagbantay ag pagtao it seguridad agud nga masiguro ro kaeuwasan it mga deboto ag turista.
Sa pihak nga parte, ginsuhestiyon man it opisyal sa lokal nga gobyerno nga mapaeapad ro festival zone agud nga indi makaangkon it traffic ag pagpang gutok sa mga karsadahon.
Raya hay bangud maabu nga banda ag grupo nga nagpasakop sa nagkaeain-eain nga kategorya ag kompetisyon kamana man ro pagbuhos it maabu nga mga pumueoyo.
