BANGA, Aklan—Nagapati si Punong Barangay Sofronio Bunyog it Brgy. Polo, Banga nga maeayo ro anggulo nga may foul play sa natabo nga pagkaeomos ni Jhuros Flores ko Enero 29, 2025.
Raya hay sa tunga it mga nagguwa nga fake news ag nagapabilin nga palaisipan sa pamilya ro pagpabilin nga missing it eawas it binatilyo nga haeos daywang dominggo eon ro nakataliwan halin kat natabo ro insidente sa pihak it maabo ro nagboluntaryo nga magsisid ag mag-usoy nga mga divers ag rescuers.
Ginpahayag dugang ni kapitan nga base sa anang pagpangusisa, posible ro kamatuoran nga aksidente ro natabo matapos nga nakabuhi raya sa anang kaibahan nga anang ginkapyutan agud nga makatabok kunta sa pihak nga pangpang.
Ginatan-aw man ni Punong Barangay Bunyog ro posibilidad nga base daywa sanda ro naeomos kon uwa nakabuhi si Jhuros ag imaw eamang ro inde kaantiguhan mag-eangoy.
Mag-eowas kara, bilang tumandok it nasambit nga barangay, uwa imaw nagapati nga may mga engkanto ukon anuman nga tag-lugar nga nagaistar nga ginasugid it mga faith healer nga nagbuoe kay Jhuros bangud nga dikaron mismo sanda nagahampang ag dikaron eon imaw nagkaantiguhan nga mag-eangoy.
Ginklaro dugang ni kapitan Bunyog nga insigidang narespondehan ro insidente sa pinaagi it pagbayanihan it mga residente, pagresponde it Banga Municipal Disaster Risk Reduction Management Council ag ro pagpangusisa it Banga PNP personnel.
