KALIBO, Aklan–Nagapanawagan si Punong Barangay Gil Morandante sa mga residente it barangay Tigayon, Kalibo sa mga posibleng may nasayuran ukon nakasaksi sa krimen nga kunta hay magguwa ag magbulig agud nga insigidang matumod ro pagkatawo it mga suspek.
Raya hay may kaangtanan sa nakit-an nga patay nga eawas it sangka eaeaki nga ginputos it bedsheet ag pagkatapos hay ginpilak sa kilid it karsada sa barangay Albasan, Numancia, Biyernes it agahon.
Suno kana nga maskin sanda hay nakibot kat masayuran nga ro abandonadong motorsiklo sa pediroad sa road 8 it nasambit nga lugar hay ginapanag-iyahan it biktimang si Jack Mererague, 41 anyos it Guibongan, Miag-ao, Iloilo.
Kabay suno kana nga makabulig sa imbestigasyon it mga otoridad ro mga footages nga narekober sa andang bag-ong install nga CCTV camera sa lugar.
Kapin sa 14 nga mga CCTV cameras ro gin-umpisahan nga i-install sa haeos tanan nga lugar sa Tigayon.
