Kalibo Aklan ——-Gin-ako ni Barangay Kapitan Riza Relojo it Brgy. Cupang, Banga nga andang gingamit para sa personal nga kinahangeanon ro pundo it andang Barangay nga naga-abot sa P939,000 pesos.
Apang, pagklaro ni Kapitan Relojo, bukon eamang it imaw ro una sa likod it paggamit it andang pundo sa Barangay bangud nga kaibahan nana kara ro andang Barangay Treasurer nga si Lourdes Zambrona.
Ginapahayag dugang nga nagkasugot sanda it anang Barangay treasurer nga i-withdraw ro pundo it andang Barangay bangud pareho sigon sandang nagakinahangean it kwarta.
Aminado man imaw nga eubos ro anang pagsalig kay Lourdes ag nagkasugot sandang daywa nga gamiton anay ro kwarta it Barangay.
Sa makarun hay ana sigon nga pagatinguhaon nga maibalik ro balor it kwarta nga anang hagamit maghalin sa nasambitan nga pundo.
Samtang, ginhingyo man nana si Lourdes nga makipagbueoligan ag makipag-istorya kana agud nga mas madasig nga masolbar ro andang problema.
Dugang pa kara nga dapat hay mag-ako eun si Barangay Treasurer Lourdes angot sa andang ginhimo.
