KALIBO, Aklan—Masako eun ro pilang ka mga pomoeuyo ag negosyante sa Aklan Provincial Capitol agud nga magpreparar sa nagahilapit nga ika-66 nga anibersaryo it Aklan Day sa adlaw it Lunes, Abril 25.
Mataeopangdan ro mga negosyante nga nagapahaom eun it andang puwesto ag mga baligya kun sa siin makarun nga adlaw it Biyernes hay pagabuksan eun raya para sa mga bumaeakae.
Nasayuran nga pila eamang sa mga makit-an makarun sa kapitolyo hay ro mga panananom nga gina-display it pilang ka mga plantita ag plantito.
Samtang may mga food stall man para sa mga gustong magbakae it pagkaon.
Suno kay Ms. Hazel Reyes, Sr. Tourism Operation Officer it Provincial Tourism Office nga maga-eawig ro nagkaeain eain nga mga exhibit hasta sa katapusan it Abril.
Mag-euwas kara, magapatigayon man it Aklan Provincial Government Sports Feast kun sa siin may pilang ka mga sports activities ro nagkaeain eain nga departamento sa probinsya.
May una man nga art exhibition nga pagapartisiparan it mga Aklanon.
Samtang igabalik man sigon ro Aklan piña and fiber festival ag ro talibong festival.
Mag-euwas pa kara hay maabo pa sigon sandang mga nakalinyada nga aktibidad para sa nasambitan nga selebrasyon.
May kaangtanan kara, gina-enggayo sigon nanda ro publiko nga magbisita sa kapitolyo apang indi man pagkalipatan nga magsunod sa gihapon sa ginapatuman nga health protocol.
