KALIBO, Aklan—Bukon it pabor ro KAPOTODA ukon Kalibo Poblacion Tricycle Operators and Drivers Association sa bag-ong fare matrix para sa mga tricycle nga nagabiyahe sa banwa it Kalibo.
Raya hay matapos nga gin-aprubahan eon ro municipal ordinance no. 2022-055 nga may titulo nga “ordinance regulating the operation of tricycle in the municipality of kalibo within the period of declared alert level system and implementing new fare rate in response to COVID 19 pandemic.
Suno kay Jervy Ibarra, acting president it KAPOTODA nga owa sanda ginpatawag sa ginpatigayon nga nga public hearing rason nga owa nabatian ro andang boses.
Gusto sigon nanda nga ipatuman ro dating panueuktan nga 15 pesos kabaylo it ginaduso makaron nga 10 pesos nga may daywang piso nga discount sa mga PWD, estudyante ag mga senior citizens.
Mag-eowas kara, matsa imposible man makaron nga tiempo nga maka-pick-up it limang pasahero nga ginpasugtan sa idaeum it bag-ong ordinansa.
Nakabakho man sigon ro kaabuan kanda bangud sa sunod-sunod nga oil price increase.
Nakabaehag sa ordinansa nga igapatuman ro bag-ong fare matrix agud nga malikawan ro pagtaeang it mga pasahero ag drivers angot sa pamasahe makaron nga una sa alert level 3 ro Aklan.
Padayun man nga ginapadumdum ro mga drivers nga pagapapanaugan it multa ukon iga-impound ro tricycle sa oras nga owa it makita nga nakapaskil nga bag-ong fare matrix sa andang saeakyan.
Gina-engganyo man ro mga drivers nga indi magpasakay it pasahero nga owa it suksok nga face mask.
Padayun man dapat nga magbutang it alcohol ukon hand sanitizer sa andang tricycle.
Gindugang pa ni Ibarra nga gintawagan eon imaw it Sangguniang Bayan it Kalibo kaibahan ro iba pang mga presidente it kada tricycle operators and drivers association nga magbo-oe it bag-ong fare matrix nga igapanupod sa andang mga miyembro.
Apang para kana hay matsa owa sigon imaw naila nga magbo-oe it kopya bangud nga eabag raya sa andang kagustuhan.
