Nagpaabot it kabaeaka si Mendel Valenzuela, presidente it Kalibo-Poblacion Tricycle Operator Drivers Association (KAPOTODA) angot sa pag-angkon it daywang faction it andang organisasyon.
Suno kana, sa idaeom it dating nagadumaea it nasambit nga organisasyon, nataeupangdan nana nga raya hay recognized eamang ag bukon it accreditted it lokal nga gobyerno it Kalibo.
Bangud kara, gintinguhaan sigon nanda nga kompletuhon ro andang mga kinahangean para nga ma-accredit ro andang faction.
Apang, pag-abot sigon it buean it Agosto hasta it Oktubre, nagguwa ro sambilog pa nga faction ag nag-reklamo sa Department of Labor and Employment (DOLE) nga dapat imaw ta sigon ro irekognisa bilang presidente it KAPOTODA.
Paathag ni Valenzuela, nag-angkon man sigon it pag-ilistorya sa tunga nanda it nasambit nga persona, ag klaro sigon nga ginhambae kara nga uwa raya it interes nga maging presidente it organisasyon, rason nga si Valenzuela eon lang ro nagpresident para dumaeahan ro nasambit nga organisasyon.
Makaron sigon hay naga-angkon it problema sa pag-accredit it andang faction bangud nga ginapahayag nga indi sigon imaw pwede maging presidente bangud nga bukon imaw it taga Kalibo.
Ginpahayag man nana nga base sa anang pag-tan-aw, kun i-base sa mga dokumento hay sanda ro makabig nga legal bangud nga nag-agi sanda sa tama nga proseso ag uwa sanda it ginhimo nga unconstitutional. Gusto eamang sigon nana nga ipaabot nga sanda ro dapat kilaean-on nga lehitimong KAPOTODA ag haum man sigon imaw nga mag-pakita it mga dokumento nga maga-pamatuod kara.
