KALIBO, Aklan—Nagapati ro sangka ginang nga kapre nga naga-istar sa haunted house ro nagpabatyag sa anang mister samtang nagadakop it alimango sa sangka fishpond sa Brgy. Caano, Kalibo.
Suno kay nanay Delia, residente it nasambit nga lugar nga gin-istorya it anang asawa nga kat maeapit eon imaw sa haunted house hay gulping napundi ro anang flashlight nga maskin ano pa ro anang ginhimo nga pag-ayos hay owa nag-andar.
Dugang pa nga gulpi imaw nga nakahugum it baho it tabako nga nagpatindog it anang baeahibo.
Bangud sa kahadlok nga nabatyagan, owa eon lang sigon ginpadayun it anang mister ro pagpangdakop it alimango nga anda kunta nga igasuea .
Makangawa-ngawa nga pag-abot sa baeay it anang mister hay naghayag it uman ro anang flashlight .
Sa pihak nga parte, nagapati ro pamilya nga may naga-istar gid man nga kapre ag iba pang indi mapaathag nga elemento sa lumang baeay .
Raya hay bangud nga maabu eon nga mga motorista nga naga-agi kamana man pilang mga residente maeapit sa lugar ro nagahambae nga may mga kahigayunan nga nakakakita sanda it sangka babaye nga nakaputi nga nagatikang sa karsada ukon nagadungaw sa bintana, sangka eaeaki nga naga-guyod it kadena ag sangka unga nga nagatangis sa sangka kuwarto.
Mabuhay sigon nga tiempo nga may naga-eksister nga mga makarondaya nga istorya umpisa nga unga pa ro anang mister.
aminado man imaw nga accident prone area ro lugar nga maeapit sa haunted house apang kaabuan sa naaksidente hay mga hilong.
Ro ginakabig nga haunted house sa Brgy. Caano Kalibo hay luma nga baeay ni dating Mayor Federico Icamina, ro pinakamaeawig nga nagsirbing alkalde it Kalibo.
Ginatawag man raya it mga tumandok bilang “baeay nga bato”.
Sikat raya sa mga istorya it kababalaghan, kun sa siin, ginasugid nga kinahangean nga magbusina ro mga saeakyan kon naga-agi sa tungod it baeay.
Ginpahayag dugang nga gina-alegar nga nasunog ro baeay ko giyera mundiyal numero dos.
