LEZO, Aklan—Owa pa it persons of interest ro kapulisan nga nagpang-budol sa mag-asawang negosyante nga gina-alegar nga puro foreigner sa diversion road nga sakop it Brgy. Carugdog sa banwa it Lezo.
Suno kay P/Lt. Zoila Hilario, deputy chief of police it Lezo Municipal Police Station, nagapadayun pa ro andang imbestigasyon sa insidente.
Nagdangop suno kana ro mag-asawang Erwin ag Fely Nagtalon sa andang taeatapan pasado alas 5:30 eon it hapon ko Miyerkules, Marso 5 sa pihak nga alas-2 pa it hapon natabu ro insidente.
Raya hay matapos mataeupangdan sigon it mag-asawa nga owa eon ro andang kapin sa P60,000 nga cash nga naka-sobre sa sueod it andang bag sa pag-uli sa andang baeay sa Brgy. Camanci Norte, Numancia.
Padayun man ro andang backtracking sa CCTV sa posibilidad nga matumod ro pagkatawo it mga suspek nga ginaeakipan it daywang eaeaki ag daywang babaye nga matsa itsurang mga Indian national ukon mga Bombay.
Samtang, laygay ni P/Lt. Hilario nga indi magpati sa mga tawong basta-basta eamang nga nagapaeapit ag nagapakilaea.
