KALIBO, Aklan—Nagapangayo it hustisya ro misis it 37-anyos nga biktima nga ginbuno-patay sa sangka namatyan sa Brgy. Estancia, Kalibo, Aklan.
Suno kay Ana Mae Montoya, misis it biktimang si Rolly Montoya, sangka kargador sa tindahan, tumandok it Brgy. Camaligan, Batan ag presenteng naga-istar sa nasambit nga lugar nga magsurender eon ro suspek sa krimen nga si Anthony Villorente, alyas “Bong-bong”, residente it Brgy. Oyang, Libacao ag presenteng naga-istar man sa nasambit nga lugar.
Mabahoe ro anang pagpati nga planado ro pagpatay sa anang mister bangud nga matapos sigon nga mabuno ro anang mister hay nagsakay ro suspek sa nagahueat nga get-away vehicle kaibahan ro tatlong iba pa nga kasabwat nana sa krimen.
Nagakalisod man ro misis bangud nga puro maintok pa ro andang mga unga kun sa siin ro andang panganay hay pitong dag-on ag ro kamanghuran hay tatlong buean pa eamang.
Desidido man sigon sanda nga magpasaka it nagakaigo nga kaso.
Suno kana nga bangud eamang sa pag-diskusyon tuga it owa pagka-ilintindihan sa sugae hay natigayon nga mabun-an ro anang asawa.
Aminado imaw nga joker ro anang asawa ag naka-inom ro suspek rason nga posibleng gin-seryoso kara ro anang mga hinangae.
Nagapa-uli eon kunta si montoya kat ginsundan ni Villorente, kun sa siin, sa anang pag-ihi hay ginbuno raya sa anang likod.
